#DelhiBraveHeart (Nirbhaya)

Ne Apni Maa Se Kuch Sawaal Kiye Thay, Ye Uski Maa Ka Jawab Hai

Maa Ka Jawab

Haan beti tu zinda hai, tu mar nahiin sakti.

Tere aansu aaj bhi meri aankho.n se tapakte hain,

Teri cheekh mere hi dil se uthti hai, 

Tera dard mujhmein hi rota hai,

Wo haadsa, baar baar hota hai.

Wo haadsa baar baar hota hai.

Teri saansein, mujhmein abbhi chal rahi hain,

Teri aahein mujhmein sisak rahi hain

Tere khwab mujhmein zinda hain.

Papa jab bhi aate hain, ab bhi tujhko bulaate hain,

Pani tere hi haathon se peete hain,

Tu unki ungliyon mein ab bhi rahti hai,

Rakt ban kar unki rago.n mein bahti hai.

Wo tujhe paas bulaate hain,

Thappkiyaan de kar aajbhi sulaate hain,

Haan ye aur baat ki khud raat raat jaagte hain.

Bhaiyya, waisa hi shaitaan hai, apne aansu chhupata hai,

Wo kisi ko nahiin sataata hai,

Ab to mujhko bhi nahiin jagaata hai,

Subha chup chaap college ko nikal jaata hai.

Main theek hoon beti, kab soyii kab jaagi pata hi nahin chalta,

Kab sham hoti hai, kab din dhalta

Dil ab nahiin sambhalta.

Aaj tere pasand ki kheer banayi thi,

Maine pehle kabhi nahiin,  par aaj khayii thi

Tu sach kahti thi, achchi banti hai

Kal gajar ka halwa banaungi,

Aur tujhko saamne baitha hua paungi

Bhaiyya ke sath tujhe bhi khilaungi.

Ruk tere Papa bula rahe hain,

Kahte hain kis se baatein kar rahi hai,

Wo ab nahiin hai,

Kya kya kahte hain, Unko kuch nahiin pata hai

Beti tu mere paas hai, mere paas hi rahegi

Hindustan ki har Maa, tujhe apna kahegi

Papa se mat kahna ki mai tujhse baatein karti hoon

Ek Maa ko beti se baatein karne se rokte hain

Har pal hi tokte hain

Samjhte nahiin hain

Khair tu ruk, kahiin jana nahiin

Main aaungi, tujhse dher sari batein karni hain

Dher sari baatein karni hain.

Beti tu jaana nahiin…..